Kassav i fer vibre kiltir kreol dan Stad Popiler

Kassav i fer vibre kiltir kreol dan Stad Popiler

27-October-2014
Stad Popiler ti plen Sanmdi swar pour konser Kassav, sa group mitik ki ti’n perform isi Sesel pour premye fwa depi 1991.
Spektater ti dan milye laplenn e menm lo graden pour ekout Kassav perform zot lanmizik zouk.

Sa spektak ki ti dir pour plis ki 2 er-d-tan ti ganny organize par Minister Tourizm ek Kiltir konman enn bann aktivite kle dan kad selebrasyon 29enm Festival Kreol ki nou pe selebre sa lannen.

Pour ouver sa spektak ti santez Seselwa Antoinette Dodin e ti swiv par Jakhim. Sa de santer Seselwa ti met laganm e sof piblik pour akeir Kassav lo lasenn. Vye konman zenn ti’n desann Sanmdi swar pour vin apresye sa spektak Kassav – en group ki zot dernyem performans isi ti 23-an pase.

Letan ki Kassav ti pe sant zot bann sanson tel ki Oh Madianna, Zouk la Sé Sél Médikaman Nou Ni e plizyer lezot ankor Stad Popiler ti tranble e menm leko lavwa bann ki ti dan lodyans ti rezonnen dan Montanny Trois Frères.

Menm si ti enpe difisil pour kapab fer en konversasyon avek vibrasyon ek ritm lanmizik ki ti pe sekwe Stad Popiler zournalis Seychelles NATION ti fer en pti letour parmi bann spektater pour ganny zot lopinyon lo spektak.

«Mon ti la pour dernyen spektak e mon santi sa menm latmosfer ki ti annan dernyen fwa. Mon pa ti pe ekspekte vwar sa kantite zenn ki a sa lepok ti swa ankor pti oubyen pa ti ankor ne,» en msye ti dir.

En zenn ti dir : «Ler ti anonse ki Kassav ti pe vini mon paran ti rakont mwan ki mannyer ti ete. E vi ki mon’n ekout enn de zot sanson e vwar li zoli, mon ti dir avek mon lekor pourkwa pa mon pa vin get spektak.»

Pour fer zot rapel ki Kassav ti deza dan en tournen pour selebre zot 35-an legzistans e zot in fer sa zefor spesyal pour vin fer en spektak pour zot osi montre ki zot apresye zot kreolite.

Nou seri portre i montre lanbyans pandan spektak Kassav.

http://www.nation.sc/article.html?id=243449