Travay i entansifye pour ranplas tiyo desarz dan lavil

Travay i entansifye pour ranplas tiyo desarz dan lavil

22-September-2016


Travay pour ranplas bann gro tiyo desarz ki’n avarye dan Viktorya in entansifye depi detrwa semenn e la in ariv dan rezyon moniman Bisantener, waterfront ek Marine Charter.
Msye Franky Dupres, enzenyer prensipal kot PUC ki pe sirvey bon deroulman sa proze ki pe antreprann par kontrakter Ascent Project, ti dir yer ki sa travay ki ti konmanse depi Me lannen pase in rankontre plizyer retar me la ziska prezan pe ase byen deroule.
Msye Dupres i dir ki sa bann vye tiyo ti pe kase a plizyer repriz e ti’n ler pour ranplas zot.
I dir sa travay ti konmans kot stasyon laponp limero 5 kot Unity House kot en laliny tiyo in ganny ranplase. Sa in pas atraver laplenn Freedom Square pour ariv kot laponp limero 6 obor Labank Komersyal Sesel.
Apartir stasyon laponp limero 6 pour al dan stasyon laponp santral dan ansyen zarden zanfan Msye Dupre i dir zot pe ranplas 2 laliny tiyo e travay aktyel ki pe deroule kot bann gran transe in fouye se pour enstal sa 2 laliny tiyo ki pou pas deryer Marine Charter, devan Yacht Club e al fini dan en nouvo stasyon laponp santral ki pe al konstrir lo en bout later leta dan zanmerant apre Yacht Club.
Msye Dupres i dir zis ranplasman sa bann tiyo tousel pe kout par lao 3 milyon roupi.
Anvi tou bann retar ki sa proze in rankontre, Msye Dupre i dir ki la i ekspekte konplete dan enn a 2 mwan.

http://www.nation.sc/article.html?id=251128