Travay renovasyon lo ansyen Lakour Siprenm anvil in preski konplete

Travay renovasyon lo ansyen Lakour Siprenm anvil in preski konplete


Travay renovasyon ki ti pe fer lo ansyen Lakour Siprenm anvil in preski konplete e i mank selman enn de pti latous pour fer anndan.
Ler travay i fini, ki ekspekte konmansman lannen prosenn, sa batiman pou vin nouvo Mize Listwar Nasyonal.
Sa ti fer resorti par Madanm Beryl Ondiek , direkter Mize Nasyonal, dan en entervyou avek lapres sa semenn.
Pandan letan ki batiman ti fermen bann koleksyon ti ganny byen stoke e netwaye pour kit zot an bon kondisyon.
“Nou ti annan nou en plandaksyon ki ti anplas kot bann staf ti pe fer sir ki koleksyon i ganny byen mentenir. Bann lobze pe ganny selekte. Nou annan nou en ‘storyline’ ki nou pe travay lo la ki nou’n preski finalize. E nou fer sir ki tou keksoz i anplas pour ler nou ouver batiman nou’n pare pour antre,” Madanm Ondiek ti eksplike.
Madanm Ondiek ti osi dir ki zot oule ler dimoun i antre dan sa nouvo mize zot vwar keksoz ki ase signifikan. Zot oule osi ofer zot kliyan en bann lobze ki a fer zot vreman satisfe avek zot vizit.
“Par egzanp nou pe mazin met nouvo ‘display’, annan en seksyon listwar kreol Seselwa, montre enn pti pe nou lidantite kot nou sorti, ki nou ete,” Mme Ondiek ti dir.
Menm ki travay in ganny enpe retar pour konplete, Madanm Ondiek i dir ki en bon louvraz in ganny fer e ki zot satisfe avek.
Me i ti osi fer resorti ki en mize pa parey en nenport ki lofis ki nou antre ladan. I annan bann norm ki bezwen ganny swiv avan antre ladan.
“Nou bezwen fer sir ki sa batiman ek son tanperatir i ‘conducive’ avek sa koleksyon ki pe ganny met ladan. Akoz nou pa kapab antre dan en batiman ki apre enn de mwan konmans ganny problenm avek bann koleksyon,” i ti dir.
Mme Ondiek in osi dir ki zot annan en ‘exhibition designer’ ki pe ed zot dan plasman zot bann lobze pour kre en lanbyans byen atiran.
Ler i ti pe koz lo travay spesifik ki’n ganny fer lo sa batiman, Madanm Ondiek ti dir ki isi Sesel nou pa’n zanmen annan en batiman spesifik pour mize. Alor vi ki ti annan bann pti konpartiman anndan, zot in bezwen kase, agrandi pour vin bann galeri.
I annan en komite mize ki desid lo fonksyonnman en mize me ziska prezan, Madanm Ondiek ti dir, zot pa ankor deside konbyen zot pou sarz larantre dan mize.
Travay renovasyon lo batiman ti fer par lakonpannyen konstriksyon GICC a en kou R14.69 milyon.

http://www.nation.sc/article.html?id=256402